සම්මුඛ පරීක්ෂණ ප්‍රශ්න: ඔබට මෙහි වැඩ කිරීමට අවශ්‍ය ඇයි?

රැකියා අයදුම්කරුවන් පිළිතුරු දීමට සූදානම් වන සියලුම සම්මුඛ පරීක්ෂණ ප්‍රශ්න අතුරින් වඩාත් පැහැදිලි නමුත් ඔබගේ ඒවා අවම අවධානයක් ලබා දුන් ප්‍රශ්නයකි මේ. 

ඔබ බොහෝ විට සම්මුඛ පරීක්ෂණ වලට පෙර මෙහි දැක්වෙන ප්‍රශ්න වලට සාර්ථකව පිළිතුරු දෙන ආකාරය ප්‍රගුණ කරනු ඇති සිතමි. නැතිද? නැතිනම් එය අනිවාර්යයෙන්ම කළ යුතු වන්නේ එමගින් ඔබට අනික් අය අභිබවා කැපී පෙනීමට ඒවා මහත් සේ උපකාර වන නිසාය. 

• අපට ඔබ ගැන කියන්න.  
• ඔබේ ලොකුම දුර්වලකම කුමක්ද?
• ඔබේ ලොකුම ශක්තිය කුමක්ද? එය භාවිතා කළ අවස්ථාවක් විස්තර කරන්න. 
• ඔබ බැබළුණු මොහොතක් ගැන කියන්න. 
• ඔබ මුහුණදුන් අභියෝගයක් විස්තර කරන්න. එය ජයගත්තේ කොහොමද? 
• එමගින් උගත් පාඩම් මොනවාද?

සමහර විට දුෂ්කරම රැකියා සම්මුඛ පරීක්ෂණ ප්‍රශ්න සරලය, වඩාත්ම සෘජු වේ.

ඇයි ඔයාට මෙම ආයතනයේ වැඩ කරන්න ඕන?

 ඔබ යන සෑම සම්මුඛ පරීක්ෂනයකදීම ඔබ මෙම ප්‍රශ්නය අපේක්ෂා කළ යුතුය. ඒ සඳහා අනිවාර්යයෙන්ම සූදානම් විය යුතුය. 

“ඔබට මෙහි වැඩ කිරීමට අවශ්‍ය වන්නේ ඇයි?” ප්‍රශ්නය පිළිතුරු දෙන්නේ කෙසේද?

තමන් ඉල්ලුම්කළ රැකියාව කුමක්ද, එහි වගකීම් සහ අන්තර්ගතය කුමක්ද, එය සාර්ථකව කරන්නට අවශ්‍ය දැනුම, කුසලතා, අත්දැකීම් සහ පුද්ගල ගුණාංග මොනවද නොදැන එයට සාර්ථකව පිළිතුරු දිය නොහැකිය. 

තිස් වසරක වෘත්තීය පළපුරුද්ද සහ අත්දැකීම් තුළින්ද සම්මුඛ පරීක්ෂණ මේසයේ දෙපසම සෑහෙන වරක් වාඩි වී සිටි අයෙකු ලෙස, මෙහිදී මම මූලික ප්‍රවේශ තුනක් නිර්දේශ කරමි:

• සේවායෝජකයාගේ ආයතනයේ මෙහෙවර, නිෂ්පාදන හෝ සේවා ගැන ඔබේ පුද්ගලික ආශාව ප්‍රකාශ කරන්න. 
• ඔබ ඉල්ලන රැකියාවේ භූමිකාව තුළ වගකීම්වලට ප්‍රිය මන්දැයි පැහැදිලි කරන්න.
• ඔබේ කුසලතා සහ පළපුරුද්ද අනුව ඔබට එම රැකියාවේ වගකීම මනා ලෙස ඉටු කළ හැකි බව පැහැදිලි කරන්න. එවැනි අත්දැකීමක් නැතිනම්, එහි සාර්ථක වන්නට උගත යුතු දේ ඉගෙනීමට ඔබ කැමති බවත්, එම ආසාවට මුල් වන හේතුත්  විස්තර කරන්න.

ඔබේ පිළිතුර සංක්ෂිප්තව තබා ගන්නා තාක් කල් ඔබට මෙම ප්‍රවේශ තුනෙන් එකක් හෝ තුනෙහි ඕනෑම සංයෝජනයක් භාවිතා කළ හැකිය. මෙහිදී ඔබට මග පෙන්වීමට නියැදි පිළිතුරු සමඟින් එක් එක් ප්‍රවේශය පලදායී ලෙස හසුරවන්නේ කෙසේදැයි පැහැදිලි කරමි. 

1. සේවායෝජකයාගේ ආයතනයේ මෙහෙවර, නිෂ්පාදන හෝ සේවා ගැන ඔබේ පුද්ගලික ආශාව ප්‍රකාශ කරන්න. 

සේවායෝජකය ආයතනයේ මෙහෙවර, නිෂ්පාදන හෝ සේවා ගැන ඔබේ පුද්ගලික ආශාව ප්‍රකාශ කරන්න. භාණ්ඩයක, සේවාවක, මෙහෙවරක හෝ වෙළඳ නාමයක හැඩය කෙසේ වුවද ඔවුන් කරන දේ ගැන ඔබ දැඩි උනන්දුවක් දක්වන ගැනීමට සේවා යෝජකයෝ කැමතිය. 

මෙම ප්‍රවේශයෙන් “ඔබට මෙහි වැඩ කිරීමට අවශ්‍ය ඇයි?” යන්නට පිළිතුරු දීම ආයතනය ගැන කිසිදු හෝඩුවාවක් නැති කෙනෙකුට අසීරුය. එනිසා සම්මුඛ පරීක්ෂණයට පෙර ආයතනය ගැන සොයා බලන්න. එහි මෙහෙවර කුමක්ද? නිෂ්පාදන හෝ සේවා මොනවාද? එහි රැකියාව කරන ය ඔබ දන්නවද?  

විනාඩි දහයක ගූගල් සෙවීමකින් ඔබට බොහෝ විස්තර සොයා ගත හැකිවේ. සමාගමේ වාර්ෂික වාර්තාව මහත් අගනා සම්පතකි. සමගම සහ එහි භාණ්ඩ හෝ සේවා සහ නවතම ව්‍යාපෘති ගැන ප්‍රවෘත්ති කියවා බැලීමයි. මේ සඳහා ගුගල් සෙවීමේදී වෙනම News ටැබ් එකක් පෙන්වයි.  

ඔබ මගෙන් ඇසුවොත්, මා කියන්නේ, එවැනි තොරතුරු සෙවිය යුත්තේ සම්මුඛ පරීක්ෂණයට පෙර නොව, රැකියා ඉල්ලුම් කවර ලිපිය, එනම් ඔබේ ජීව දත්ත යවන විට අමුණන රැකියා ඉල්ලුම් ලිපිය (Job application cover letter) ලියන විට බවයි. 

ඒ කෙසේ වුවත්, අවසානයේදී හෝ කිසි විස්තරයක් නොදැන සම්මුඛ පරීක්ෂණවලට යාමෙන් ඔබ කරන්නේ ඔබගේ අසාර්ථකත්වයට මග පාදා ගැනීමකි. එසේ නොකර, මහන්සිවී, කාලය වැය කර සෑම සම්මුඛ පරික්ෂණයකදීම මෙම ප්‍රශ්නයට සාර්ථකව පිළිතුරු දෙන්නට සුදානම් වන්න යනු මගේ අවවාදයයි. 

ඔබගේ වගකීම වන්නේ, සම්මුඛ පරීක්ෂකයාට ඔබගේ උනන්දුව සහ සුදානම පැහැදිළි කර දීමයි. එමගින් ඔබට සම්මුඛ පරීක්ෂණයට එන අන් රැකියා අපේක්ෂකයින් අතරින් කැපී පෙනීමට මග පාදා ගැනීමයි. 

මෙහිදී ඔබට ඔබේ ආශාව එම ආයතනයේ සමාගමේ මූලික වටිනාකම්වලට, දැකීමට සහ මෙහෙවරට (values, vision and mission)  සම්බන්ධ කළ හැකිය. එය බොහෝ විට ඔවුන්ගේ වෙබ් අඩවියෙන් සොයාගත හැකිය. 

ඔබ ලාභ නොලබන (nonprofit/NGO) ආයතනයක භූමිකාවක් සඳහා අයදුම් කරන්නේ නම්, එම මෙහෙයුම ඔබේ පුද්ගලික වටිනාකම්වලට ගැලපෙන්නේ නම්, ඔබ තනතුර ගැන දැඩි උනන්දුවක් දක්වන බව පෙන්වීම විශේෂයෙන් වැදගත් වේ.

2. ඔබ ඉල්ලන රැකියාවේ භූමිකාව තුළ වගකීම්වලට ප්‍රිය මන්දැයි පැහැදිලි කරන්න.

අප යම් කාර්යයක් තුළින් තෘප්තියක් ලබන විට වෙහෙස මහන්සි වී, වඩා හොඳින් වැඩි දිගු කාලයක් වැඩ කරන්නට හැකි බව නොරහසකි. ඔබ පාඩම් කරනවාට වඩා වීඩියෝ ගේම් ගසන්නට හෝ සංගීතය රස විඳින්නට හෝ පොතක් කියවන්නට කැමති මේ හේතුවෙනි. කුඩා කල රෑ නොනිදා පොත් කියවූ අයුරිම කොපමණ මහන්සි වුවද නිදිමත නොවී පොත් කියවීමට මට තවම හැකිවේ. එසේද කරමි. 

ඔබ යම් දෙයක් කෙරෙහි දැඩි ඇල්මක් දක්වන විට, එය ඔබගේ ජීවිතයේ වෙනත් පැතිවලට කාන්දු වනු ඇත. ඔබේ ජීවිතයේ එවන් උදාහරණ හඳුනාගෙන ඔබේ සම්මුඛ පරීක්ෂණයේදී ඒවා  ප්‍රශ්න අසන්නා සමග බෙදා ගන්න. උද්යෝගය ප්‍රකාශ කිරීම යනු මහා හඬින් කතා කර උද්යෝගය ප්‍රදර්ශනය කිරීම නොවේ. ඔබ එම ආයතනයේ මෙහෙවර, ඔවුනගේ භාණ්ඩ හෝ සේවා හෝ වෙනත් සමාජ මෙහෙවර ගැන ප්‍රියබව සහ එයට මුල්වන හේතුව හෝ හේතු පැහැදිලිව ප්‍රකාශ කිරීමයි.

තමන්ගේ කාර්ය මණ්ඩලයෙන් එම කැපවීම සොයාගැනීමට අකමැති වන්නේ කුමන සේවායෝජකයාද? නමුත් රැකියාව සහ එමගින් ඔබ ලබන ප්‍රීතිය අතර වන සම්බන්ධය පැහැදිලි කිරීම ඔබේ වගකීමකි. එම සම්බන්ධය “මෙම කාර්යය මා රස විඳින දෙයක්” තරම් සරල විය හැකි නමුත් ඔබ එය ප්‍රකාශ කිරීම මගින් එම කරුණ වඩාත් මතකයේ රැඳෙනු ඇත.

ඔබ උද්යෝගිමත් වන්නේ ඇයිද යන්න ප්‍රථමව ඔබට පැහැදිලි විය යුතු බව මතක තබා ගන්න. සයිමන් සිනෙක් “ඇයි” ​​යන්නෙහි වැදගත්කම පිළිබඳව අප සැමට උගන්වා ඇත. සිනෙක් ඔහුගේ මහත් ජනප්‍රිය වූ ‘Start With Why’ කෘතියෙන් කියන්නේ ඇයිදැයි විමසීම ස්වභාවිකව ඇති වන රටාවක් බවත්, සිතීමේ, ක්‍රියා කිරීමේ සහ තොරතුරු සන්නිවේදනය කිරීමේ ක්‍රමයක් වන බවත්ය. තමන් යමක් කරන්නේ, ආයතනය යම් අතකට හසුරවන්නේ ඇයි කියා පැහැදිලිව හඳුනාගන්නා නායකයින්ට එමඟින් ඔවුන් වටා සිටින අනුගාමිකයන්ව දිරිගැන්වීමේ මහත් හැකියාවක් එමගින් ලබා දේ. ඇයි යන්නෙන් ආරම්භ කිරීමට ඉගෙන ගන්නා සංවිධාන සහ පුද්ගලයින් වැඩි වන තරමට, තම තමා කරන කාර්යයෙන් තෘප්තිමත් වන පුද්ගලයින්ද වැඩි වනු ඇතැයි සයිමන් සිනෙක් පවසයි. 

රැකියා සම්මුඛ පරීක්ෂණයකදී ඔබට (ආයතනයේ) ඇයිද යන්න හඳුනාගෙන පිළිතුරු දීම මහත් වැදගත්ය. පසු දිනයක පොත් ගුලෙන් තවත් පොතක් කොටසින් මෙම කෘතියේ වඩාත් දීර්ඝ සාරාංශයක් ගෙන එන්නට බලාපොරොත්තු වෙමි. 

සාර්ථක පිළිතුරු  සඳහා උදාහරණ කිහිපයක්

ආයතනයේ මෙහෙවරට වන ආශාව ඵලදායී ලෙස සම්බන්ධ කරන ප්‍රතිචාර උදාහරණ මෙන්න.

“මගේ වැඩිහිටි ජීවිතයෙන් වැඩි කාලයක් මම (යම් දෙයකට) දැඩි ලෙස සහයෝගය දැක්වූයේ  (යම් හේතුවක් නිසා) බව මම විශ්වාස කරන බැවිනි…”

“X මගේ වෘත්තීය ජීවිතයේදී සහ පෞද්ගලික ජීවිතයේදී මට ඉතා වැදගත් වන්නේ මම එය දැඩි ලෙස විශ්වාස කරන නිසා…”

“මම X ගැන දැඩි උනන්දුවක් දක්වමි. මා හා සමාන මූලික වටිනාකම් සහිත වන සංවිධානයක් සඳහා වැඩ කිරීමට සතුටු වෙමි.

මම දැනට Upwork ආයතනයේ සේවාදායකයකු ලෙස සේවය අරඹා වසර 15කි. මම රැකියා සොයා දමන හැම ඉල්ලුම්පතකම මම එම ව්‍යාපෘතියට ප්‍රිය වන්නේ කුමක් නිසාද යන්න පැහැදිලිව, පළමු ජේදයෙන්ම ප්‍රකාශ කරමි. 

රැකියාව ප්‍රීතියට සම්බන්ධ කරන ප්‍රතිචාර සඳහා උදාහරණ 

“පාසලේ මගේ ඉගැන්වීමේ කාර්යයේ සිට මගේ අවසාන රැකියාවේදී මා ලැබූ පුහුණු අත්දැකීම් දක්වා අන් අයට ඉගෙන ගැනීමට උපකාර කිරීමට මම සැමවිටම ප්‍රිය කරමි. ඔබ ආයතනයේ වැඩ කිරීමෙන් මට මහත් තෘප්තියක් ලැබෙන බව මට විශ්වාස බැවිනි.”

“මම සැමවිටම ලිවීමට සහ සංස්කරණය කිරීමට ප්‍රිය කළෙමි – මගේ විද්‍යාල පුවත්පතේ ලිපි ලියු කාලයේ සිට මම සීමාවාසිකයෙකු ලෙස වැඩ කළ වෙබ් සැකසුම් සමාගමේ රැකියාව දක්වාද, ඉන් මතුවටද ලිවීම සහ සංස්කරණයෙන්  මම සතුටු වෙමි.”

“දත්ත විශ්ලේෂණය කිරීම මට සැමවිටම විනෝදයක් වී ඇත. කථාවක් පැවසීමට සහ අදහසක් ප්‍රකාශ කිරීමට අංක භාවිතා කිරීමේ අභියෝගයට මා ප්‍රිය කරමි. මෙම කණ්ඩායම තුළ අප විසින් සිදු කරනු ලබන දත්ත දෘශ්‍යකරණ (data visualization ) කාර්යය තුලින්ම එබඳු අත්දැකීමක ලබන්නට මම බලාපොරොත්තු වෙමි.”

3. ඔබේ කුසලතා සහ පළපුරුද්ද අනුව ඔබට එම රැකියාවේ වගකීම මනා ලෙස ඉටු කළ හැකි බව පැහැදිලි කරන්න.

එවැනි අත්දැකීමක් නැතිනම්, එහි සාර්ථක වන්නට උගත් යුතු දේ ඉගෙනීමට ඔබ කැමති බවත්, එම ආසාවට මුල් වන හේතුත්  විස්තර කරන්න.

සම්මුඛ පරීක්ෂකවරයා ඔබ කවුරුන්ද යන්න සහ ඔබට දැන් කළ හැකි දේ සඳහා ඔබට රැකියාව ලබාදෙයි. එනමුත් හොඳ සේවකයින් නිරතුරුවම රඳවා ගන්නට ඔවුන් උනන්දුය එබවින් අනාගතයේදී ඔබට ලබා ගත හැකි අත්දැකීම්, වැඩිදුර ඉගැනීම් වැනි දේ ගැනද ඔවුහු උනන්දු වෙති. එසේ වන්නේ ඔවුන් ඔබට රැකියාව දීම ආයතනය විසින් කරන ආයෝජනයක් ලෙස දකින බැවිනි. 

එම රැකියා භූමිකාව තුළ සාර්ථක වීමට සහ ඉන් ඔබ්බට වර්ධනය වීමට ඔබට ඇති හැකියාව ගැන විශ්වාසය පළ කිරීම සුදුසුය. 

“මේ මේ අංශ වල මා ලැබූ අත්දැකීම් අනුව, මට මා මෙම ධුරයේද සාර්ථක වන බව විශ්වාසයි.”

“මගේ කුසලතා මේ රැකියාවේදී භාවිතා කිරීමට මම බලාපොරොත්තු වෙමි…”

“මම මගේ උපරිමයන් මෙමෙ රැකියාවේ වගකීම ඉටු කරන්නට දායක වනු ඇතැයි මම සිතමි”

මෙවැනි වාක්‍ය ඛණ්ඩ භාවිතා කරන්න. වැදගත්ම දෙය නම් ඔබේ පෙර අත්දැකීම් මෙම වර්තමාන රැකියාවේ සාර්ථක වීමට ඔබව සූදානම් කර ඇති ආකාරය විස්තර කිරීමයි.

කුමක් විය හැකිද යන්න දෙස බලන ප්‍රතිචාර සඳහා උදාහරණ 

“මම අතීතයේ දී සමාන කාර්යයක් කර ඇති නිසාත් මෙම විශේෂිත පාරිභෝගිකයින් සම්බන්ධ කර ගැනීමට අවශ්‍ය දේ දන්නා නිසාත් මා මෙම තනතුරේ සාර්ථක වන බව මට පෙනේ.”

“මම හොඳින්ම වැඩ කරන්නේ සහයෝගයෙන් වැඩ කරන පරිසරයක බව මට පෙනී ගියේය. එබැවින් අපගේ අරමුණු සාක්ෂාත් කර ගැනීම සඳහා මෙහිදීද දෙපාර්තමේන්තු කිහිපයක් සමඟ වැඩ කිරීමට මම බලාපොරොත්තු වෙමි. එය මට අභියෝගයක් නොව ප්‍රියමත් දෙයකි.”

“මෙම රැකියාව ගැන වැඩි විස්තර දැනගැනීමෙන් පසු, ව්‍යාපෘති වඩාත් කාර්යක්ෂමව සහ ඵලදායී ලෙස කළමනාකරණය කිරීමට ක්‍රම සොයා ගැනීමට මට දායක විය හැකි බව මට විශ්වාසයි.”

ප්‍රවේශ තුන ඒකාබද්ධ කිරීම

ලිවීම, නිර්මාණශීලිත්වය සහ සහයෝගීතාවය ප්‍රධාන ප්‍රමුඛතා වන සෞඛ්‍ය සේවා සමාගමක් සඳහා උපකල්පිත අලෙවිකරණ ස්ථානයක් භාවිතා කරන නියැදි පිළිතුරක් මෙන්න:

මට මෙහි වැඩ කිරීමට අවශ්‍ය වන්නේ, මගේ පවුලේ වෛද්‍යවරුන් සමඟ, මිනිසුන්ට ඔවුන්ගේ සෞඛ්‍ය අභියෝග විසඳීමට සහ ඔවුන්ගේ ශරීර සහ ඔවුන්ගේ ජීවිත පිළිබඳ බුද්ධිමත් තීරණ ගැනීමට උපකාර කිරීමට මම දැඩි උනන්දුවක් දක්වන බැවිනි. මම විශේෂයෙන් සමාජ මාධ්‍ය තුළ භාවිතයට පිටපත් ලිවීමට සහ කෙටි ට්විටර් සටහන් සැකසීමටද ප්‍රිය කරමි. හොඳම නිර්මාණාත්මක අදහස් සොයාගැනීම උදෙසා සගයන් සමඟ කණ්ඩායමක් ලෙස දරන ආයාසයෙන් මම සතුටක් ලබමි. මට මෙම රැකියාවේ අවශ්‍යතා සහ ආයතනික මෙහෙවරේ අගය ගැන සිතන විට ඇදහිය නොහැකි තරම් ආශ්වාදයක් දැනේ. ඒ සඳහා මට විශාල වශයෙන් දායක විය හැකිය.

නිශ්චිත වන්න

ඔබ ඔබේ පිළිතුර ගොඩ නගන විට ඔබ වඩාත් නිශ්චිත වන තරමට, ඔබේ පිළිතුර වඩාත් බලවත් වනු ඇත. අනෙක් අතට, ඔබ නොපැහැදිලි වන තරමට, විස්තර වලින් තොර වන තරමටම ඔබගේ ප්‍රතිචාරය හුදු හිත හදන්නට කරන කතාවක් සේ පෙනෙනු ඇත.

ඉහත උදාහරණයේ දී, ලේඛකයා තමාගේ පවුලේ සෞඛ්‍ය සේවා වෘත්තිකයන් වෙත අවධානය යොමු කරයි, පිටපත් ලිවීම සහ ට්විටර් මූලෝපාය කෙරෙහි අවධානය යොමු කරයි. ලිවීම පමණක් නොවේ, වඩාත් නිශ්චිතව සහයෝගීතාවෙන් නිර්මාණශීලි 

අදහස් සොයාගන්න ආකාරයක් සඳහන් කරයි. මේ සියල්ල ඔහුගේ පිළිතුර වඩාත් පුද්ගලික සහ අද්විතීය ලෙස පෙනෙන පරිදි නිශ්චිත වන බවට උදාහරණ වේ.

“ඔබට මෙම රැකියාව අවශ්‍ය ඇයි?” යන ප්‍රශ්නයට නොකිය යුතු දේ

“ඔබට මෙම රැකියාව අවශ්‍ය ඇයි” යන ප්‍රශ්නයට ඔබ පිළිතුරු නොදිය යුතු ආකාරය කොයි කාටත් පැහැදිලිය. නමුත් එය නැවත නැවත සම්ම්මුඛ පරීක්ෂණවලදී  අසන්නට ලැබේ. 

• ඔබට රැකියාව අවශ්‍ය යැයි නොකියන්න:
• ඔබ වැටුපට කැමතියි
• ඔබ එහි වරප්‍රසාද හෝ ප්‍රතිලාභවලට කැමතියි
• ඔබ මාතෘකාවට කැමතියි
• ඔබට දුරස්ථව හෝ යම් ස්ථානයක වැඩ කිරීමට අවශ්‍ය වේ
• ඔබට ඇත්තටම මෙම රැකියාව අවශ්‍ය වෙනත් රැකියාවක් ලබා ගැනීමට නොහැකි  වූ බැවිනි.

ඔබ කරන සම්මුඛ පරීක්ෂණයකදී  මෙවැනි පිළිතුරු දුන් අයෙකුට ඔබ රැකියාවක් දෙනවාද? නැත. එබැවින් එවන් පිළිතුරු දීමෙන් වළකින්න 

ඔබගේ මීළඟ සම්මුඛ පරීක්ෂණයට පෙර…

ඔබට මෙහි වැඩ කිරීමට අවශ්‍ය වන්නේ ඇයි යන ප්‍රශ්නයට ඔබේ ප්‍රතිචාරය පුහුණු කරන්න. මේවාට සාර්ථකව පිළිතුරුදීම ප්‍රගුණ කළ යුතුය. රැකියා අපේක්ෂකයන් බොහොමයක් මේ සඳහා සෙල්ෆියක් ගන්නට යොදන කාලය තරම්වත් කාලයක් වය නොකරයි.

මතක තියා ගන්න: එවැනි ප්‍රශ්න වලට සාර්ථකව පිළිතුරු දෙන්නා හට ඔබට අවශ්‍ය රැකියාව හිමි වීමේ ප්‍රවණතාවය ඉහළය. එබැවින් සාර්ථකව පිළිතුරුදීම ප්‍රගුණ කළ යුතුය:

සාර්ථකව පිළිතුරුදීම ප්‍රගුණ කරන්න

• ඔබේ හිස තුළ පමණක් නොව හඬ නගා එයට පිළිතුරු දෙන්නට පුහුණු වෙන්න. කැඩපතක් ඉදිරිපිට ඉඳගෙන ඒ සඳහා පුහුණු විය හැකිය. එවිට ඔබේ ආත්ම විශ්වාසය සවිමත් වන තුරු පුහුණු විය හැකිය. 

• ඔබගේ මොබයිලයෙන් ඔබ ප්‍රශ්නයට පිළිතුරු දෙන ආකාරය වීඩියෝ කරන්න. එවිට තවත් දුර්වලතා හඳුනාගත හැකිය. ඔබ මුහුණ ඇඹුල් කරගත්තද, මුහුණට උසුළු පෙනුමක් එක් කරාද? ඇස් කැරකුවාද? ඔලුව කැසුවද, තැති ගත්තද? අහක බැලුවාද? ප්‍රශ්න අසන්නාගේ මුහුණ (දෑස්) දෙස ඍජුව බලන් පිළිතුරු දුන්නද?  
• වෙනත් කෙනෙකු මේසයේ අනික්පස අසුන්ගෙන ඔබගෙන් මෙම ප්‍රශ්න අසන විට සන්සුන්ව, සාර්ථකව, ආත්ම විශ්වාසයෙන්  යුතුව ඒවාට පිළිතුරු දෙන අයුරු පුහුණු වන්න. ඉහත ආකාරයේ හැසිරීම් වළක්වාගැනීම වැදගත්ය. 

ඔබ විසින් දිය හැකි හොඳම පිළිතුර ඔබට එම රැකියාව අවශ්‍ය වන්නේ ඇයිද යන්න සහ ඔවුන්ට ඔබව අවශ්‍ය වන්නේ ඇයිද යන්න පිළිබඳ විස්තර කරන්නක් බව මතක තබා ගන්න. ඔබගේ ආශාව, උද්යෝගය සහ ශුභවාදී බව නිශ්චිතව ප්‍රකාශ කරන්නේ නම්, “ඔබ මෙහි වැඩ කිරීමට අපට අවශ්‍ය වන්නේ එබැවිනි” යැයි ඔවුන් හට සිතීමට ඉඩ සලසන ආකාරයෙන් පිළිතුරු දී ඔබ සම්මුඛ පරීක්ෂකගේ කැමති ලැයිස්තුවේ ලකුණු වැඩිපුර දමාගන්න.